(ភ្នំពេញ)៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នឹងអញ្ជើញជាអធិបតីភាព បើកយុទ្ធនាការចាក់វ៉ាក់សាំងការពារជំងឺកូវីដ១៩ ជូនដល់ប្រជាពលរដ្ឋរស់នៅក្នុងតំបន់ក្រហម ក្នុងភូមិសាស្ត្ររាជធានីភ្នំពេញ និងទីក្រុងតាខ្មៅ នៃខេត្តកណ្ដាល នៅព្រឹកថ្ងៃទី៣០ ខែមេសា ឆ្នាំ២០២១ ស្អែកនេះ។ នេះបើតាមប្រសាសន៍របស់នាយឧត្តមសេនីយ៍ ឥត សារ៉ាត់ អគ្គមេបញ្ជារង និងជានាយសេនាធិការចម្រុះនៃកងយោធពលខេមរភូមិន្ទ។

យុទ្ធនាការនេះ ក្រសួងការពារជាតិ នឹងចាប់ផ្ដើមបញ្ជូនក្រុមគ្រូពេទ្យជំនាញនៃកងយោធពលខេមរភូមិន្ទ ចូលទៅកាន់តំបន់បិទខ្ទប់ ដែលមានការឆ្លងរីករាលដាលខ្លាំងនៃជំងឺកូវីដ១៩ ក្នុង «សហគមន៍ ២០ កុម្ភៈ» ទៅតាមបទបញ្ជាបន្ទាន់របស់សម្តេចតេជោ ហ៊ុន សែន ក្នុងការបើកយុទ្ធនាការថ្នាក់ជាតិ ចាក់វ៉ាក់សាំងការពារជំងឺកូវីដ១៩ ដល់ប្រជាពលរដ្ឋ ចាប់ពីអាយុ១៨ឆ្នាំឡើងទៅ ដោយផ្តើមចេញពី «តំបន់ក្រហម»ដែលមានហានិភ័យខ្ពស់ ក្នុងភូមិសាស្ត្ររាជធានីភ្នំពេញ និងទីក្រុងតាខ្មៅ ខេត្តកណ្ដាល។ យុទ្ធនការនេះនឹងចាប់ពីថ្ងៃទី០១ ខែឧសភា ឆ្នាំ២០២១ ហើយប្ដេជ្ញាចាក់ឱ្យរួចរាល់ក្នុងរយៈពេល១៥ថ្ងៃ ជូនដល់ប្រជាពលរដ្ឋទូទៅក្នុងតំបន់រងគ្រោះទាំងនោះ។